Fundación Balogal

Mario Outeiro visitou as parroquias de Adai e Cela do Corgo

2012-03-02T04:53:00.001-08:00

O programa “Todos a Xogar”, que puxo en marcha a Área de Benestar Social e Deporte da Deputación, leva máis de 50 accións na comarca de Lugo con actividades deportivas gratuítas.

O delegado de Cultura e Turismo da Deputación de Lugo, o nacionalista Mario Outeiro, visitou esta tarde aos veciños e veciñas das parroquias de Adai e Cela, no Corgo, que logo de inscribirse no programa “Todos a Xogar” están a acudir semanalmente a actividade de ximnasia xerontolóxica de envellecemento activo para persoas maiores cun monitor. Ao redor de 15 veciños e veciñas de cada parroquia acoden ás instalacións onde se xuntan para realizar actividade física aconsellada á súa idade a través do monitor da Fundación BALOGAL, no caso da veciñanza de Adai, na antiga escola, e no caso da veciñanza de Cela, no centro social da parroquia.

Mario Outeiro afirmou que “Todos a Xogar é un programa totalmente transversal, que implica desde o deporte ao benestar social, igualdade e xuventude, xa que pretende reactivar a actividade física nos segmentos de poboación que habitualmente non realizan deporte en concellos do rural nos que hai menos oportunidades, como neste caso acontece cos veciños e veciñas de Adai e Cela”. Outeiro indicou que neste proxecto de dinamización da actividade física “non só participan os concellos, senón que tamén se desenvolve en colaboración con colectivos de persoas con discapacidade, en risco de exclusión social, e a través de asociacións culturais e deportivas que constitúen a base da nosa sociedade”.

“Levar a cabo este tipo de accións na poboación do no noso medio rural ten unha importante compoñente tamén cultural e de cohesión social, xa que permite ás persoas entrar en contacto, compartir experiencias e socializar, polo que tamén son moi importantes para evitar a inactividade e o despoboamento do rural”, apuntou Mario Outeiro

MAIS DO TODOS A XOGAR

2012-02-28T04:11:00.000-08:00

O noso programa presente no CEE Infanta Elena de Monforte de Lemos.

Membros de ADACE, nun adestramento do Breogán

2012-02-27T09:09:00.007-08:00

Un grupo de membros da Asociación de Dano Cerebral Sobrevido achegouse ao Pazo para asistir a unha sesión de adestramento do primeiro equipo do Breogán.

Tras presenciar parte da sesión, os membros da asociación, coa que traballa a Fundación BALOGAL mediante o programa «Todos a Xogar», saudaron ao plante e fotografáronse co equipo e corpo técnico do clube.

Ademais, algúns deles por vez primeira, coñeceron a cancha onde o Breogán xoga os seus partidos, e animáronse con lanzamentos a canastra e levaron algún autógrafo dos xogadores do Breo.

Os membros de ADACE foron invitados para que asistan como público a algún dos vindeiros partidos do Breogán no Pazo.

ADACE é unha organización sen ánimo de lucro creada en 2006 por persoas afectadas por dano cerebral sobrevido, as súas familias, e outros colaboradores, e traballan para asesorar ás familias afectadas, e axudar na recuperación dos afectados.

ADACE é unha asociación moi dinámica que traballa en colaboración con outras asociacións e institucións. Unha desas colaboracións é coa Fundación BALOGAL, que a través do programa «Todos a Xogar», organiza actividades deportivas adaptadas coa presencia de monitores especializados.

ANTONIO VEIGA E MARIO OUTEIRO CON AFALU

2012-01-19T02:36:00.000-08:00

O Vicepresidente da Diputación de Lugo e o delegado de Deportes estiberon con participantes do programa "Todos a Xogar" da Asociación AFALU.

Os nenos e nenas do Campamento achegáronse a «ArteNadal»

2011-12-28T10:47:00.000-08:00

Os máis de medio cento de nenos e nenas que participan no Campamento de Nadal da Fundación BALOGAL coñeceron de preto aos artesáns e artistas que están durante as datas de Nadal no espacio feiral «ArteNadal» sito na céntrica Praza da Soidade de Lugo. Nunca carpa exponse o traballo destes artesáns que tiveron durante unhas horas aos nenos como aprendices e colaboradores. Os participantes comprobaron de preto cómo os profesionais traballan os materiais e colaboraron na elaboración dunha árbore de Nadal na que deixaron pendurados os seus desexos inmateriais. Gozaron tamén dun taller de pintura facial.

ArteNadal estará no centro da cidade ata o día 5 de xaneiro.

ANTONIO VEIGA NA ACTIVIDADE EN BARREIROS

2011-12-26T01:31:00.000-08:00

O Vicepresidente da Diputación de Lugo visitou a actividade en Barreiros. Para ver a nova pincha aquí.

¡BO NADAL!

2011-12-21T01:44:00.001-08:00

O corpo técnico e os xogadores do Breo felicitan o Nadal

MÁIS PRENSA

2011-12-19T00:55:00.000-08:00

O traballo da Fundación en torno ao proxecto "Todos a Xogar" segue a ser ben recibido e a xerar novas na prensa, tanto na de tirada provincial coma na local. Un novo exemplo é a páxina que lle adica o periodico de tirada mensual Terra Chá. A nova aparece na pax. 11, para ver o periódico pincha eiquí.

Fotos

2011-12-15T01:53:00.000-08:00

Comezan a chegar as primeiras fotografías das actividades do programa "Todos a Xogar", neste caso son da Parroquia de Burgás do Concello de Xermade, nela pódese apreciar o ben que o pasan os participantes.

ENTREVISTA A OSCAR GONZÁLEZ PARDO

2011-12-09T04:46:00.001-08:00

Para ver a entrevista pincha aquí

ACTOS DO ANIVERSARIO DA MURALLA

2011-12-02T11:58:00.001-08:00

Máis de dous mil lucenses "lembraronse" da Muralla e sumaronse á iniciativa de rodear o monumento bimilenario cunha corda tirada polos ciclistas Ezequiel Mosquera e Cesar Veloso. Non faltaron todos os xogadores e técnicos do Breogán, Estudiantes Lugo e, por suposto, a Fundación Balogal, que realizaron o percorrido dende a zoa peonil da Muralla ata a porta de San Fernando, lugar no que se completaba o gran circulo e os dous ciclistas xuntaban os extremos do gran cordón en presenza de autoridades e centos de lugueses.

Foguetes, actuacións teatrais e musicais, e tendo en conta o tempo no que estamos, un gran magosto completaron un acto sinxelo pero con gran afluencia no que se demostrou o aprecio que os lucenses teñen polo símbolo da cidade.

Por parte do Breo, Estudantes e Balogal, puidose observar a deportistas de todalas idades: dende os máis veteranos do equipo profesional, ata os máis pequenos da aula de predeporte, acompañados de monitores e familiares.

Todos os Monitores do programa da Fundación, "TODOS A XOGAR" colaboraron desinteresadamente no organización do acto.

LEMBRATE DA MURALLA

2011-11-28T02:52:00.000-08:00

Este mércores día 30 celebrase en Lugo o decimo primeiro aniversario da declaración da Muralla de Lugo como Patrimonio da Humanidade. Para tal fin Concello e Deputación de Lugo desenrolaron unha serie de actividades nas que a Fundación Balogal vai a estar presente. Contamos coa vosa asistencia.

PROGRAMA:

· Durante todo o día, xornada de portas abertas nos museos da cidade e agasallo de libros aos visitantes.

· 11 horas no CEI-Nodus, Av. Coruña, 490 (Antigo cuartel de Garabolos) Encontro de cidades amuralladas.

· 18:30 horas no Tramo Peonil da Muralla:

o Acto de homenaxe a Muralla no 11º aniversario da declaración como Patrimonio de Humanidade.

o Unha corda, soportada por todas as persoas que participen, rodeará a Muralla para sensibilizar sobre o coidado do monumento.

o Os ciclistas galegos Ezequiel Mosquera e Gustavo César Veloso conducirán os dous extremos da corda; poderán unirse todas as persoas que o desexen, ben sexa en bici ou a pé.

o Durante o percorrido, ata que se xunten os dous extremos da corda, haberá actuacións de diversos colectivos e artistas lucenses en todo o perímetro da Muralla.

o No momento en que os dous extremos da corda se xunten dispararanse 11 foguetes e dará comezo a festa de todas e todos os lucenses.

· 19:30 horas en todas as portas da Muralla.

o Magosto na Muralla: reparto gratuíto de castañas entre as persoas asistentes e actuacións musicais en vivo.

BALOGAL e Breogán comprométense cun decembro solidario

2011-11-23T02:38:00.000-08:00

Tres partidos e tres causas clave para ser solidarios. Os partidos do CB Breogán en Lugo dos días 3, 16 e 30 de decembro serán unha ocasión única para que tres colectivos sintan o calor do breoganismo e a súa faciana máis comprometida.

O día 3 de decembro, no partido ante Clavijo en Lugo, será o Banco de Alimentos de Lugo o que poderá recibir a axuda doa asistentes ao encontro. Alí se instalarán mesas para recoller alimentos que contribuirán a que 700 familias teñan algo quente que comer na súas casas durante semanas. O máis sinxelo é o máis útil: arroz, pasta aceite e alimentos empaquetados non perecedoiros.

O día 16 o Breogán recibe ao Cáceres Baloncesto, e será UNICEF a organización que estará presente no Pazo para recadar, mediante a venda de rifas para o sorteo de diversos artigos, entre os que estarán camisetas asinadas polos xogadores do Breo, para axudar á infancia que sufre un auténtico desastre humanitario no este de África.

Cruz Vermella estará no pazo no derradeiro partido do ano, o día 30 ante CB Granada, e recadará para as súas campañas abertas a favor da asistencia á terceira idade.

BALOGAL pon a Provincia de Lugo a practicar deporte

2011-11-21T08:49:00.000-08:00

O proxecto TODOS A XOGAR xa traballa a pleno rendemento para achegar o deporte a tódolos recunchos da Provincia de Lugo.

Son nada menos que 118 as asociacións, concellos, centros educativos e outras institucións as que traballan con BALOGAL nunha ou varias das bases nas que se apoia o proxecto: «Obradoiro Deportivo» para os máis novos; «Eu Tamén Xogo no Breo» para grupos de risco de exclusión social; «Non Te Retires, Volta Xogar» para a terceira idade, ou un programa de asesoramento administrativo a entidades coñecido como «Axúdanos a Facer Deporte».

Das 118 asociacións que traballan con BALOGAL actualmente, moitas participan en máis dunha das áreas de desenvolvemento do Todos a Xogar, e mesmos algunhas pediron participar en todas elas, como son os casos de Asoc. De Promoción e recuperación ecuestre Val de Ouro (O Valadouro); a ANPA do colexio Alvaro Cunqueiro Mora (Mondoñedo) , ou a Asociación Val de Láncara.

Os responsables do proxecto Todos a Xogar teñen por diante un traballo inxente. A resposta de concellos, asociacións e outras entidades está a ser moi positivo e BALOGAL xa traballa para levar o deporte a tódolos recunchos da provincia, especialmente en zona rural.

LISTADO DE ENTIDADES E ASOCIACIÓNS

BALOGAL levou a Manu Gómez e Álex Navajas ao Ánxel Fole de Lugo

2011-11-14T09:53:00.000-08:00

O Instituto Ánxel Fole de Lugo recibiu a visita de dous xogadores do CB Breogán acompañados polo Coordinador de BALOGAL Daniel Cordido. A iniciativa levouse a cabo coa colaboración do centro e da AMPA que queren traballar con BALOGAL e o Breogán para achegar o baloncesto aos rapaces e rapazas do centro. Tanto Álex Navajas como Manu Gómez resolveron tódalas dúbidas plantexadas polos alumnos e contaron a súa experiencia como deportistas.

Está previsto que BALOGAL e a AMPA do Ánxel Fole asinen un convenio para prolongar no tempo a colaboración a favor da práctica do deporte por parte dos alumnos do centro

Lembrando o Leyma Basket English Camp 2011

2011-11-10T03:21:00.000-08:00

Lembramos, en dous vídeos, o exitoso campus de verán 2011 levado a cabo co patrocinio de Leyma e organizado pola Vicepresidencia da Deputación de Lugo e a Fundación BALOGAL. Preto de cen nenos e nenas compartiron unhas xornadas inesquecibles con adestradores e xogadores chegados dende Estados Unidos, pertencente á prestixiosa Academia de Baloncesto FAST. Unha oportunidade para mellorar as habilidades co balón e os coñecementos de inglés.

BALOGAL leva o Breo a Becerreá

2011-11-08T03:26:00.000-08:00

Con motivo da apertura das Escolas de Baloncesto no CEIP Becerreá, a Fundación BALOGAL achegouse con varios monitores e a dous xogadores do primeiro equipo do CB Breogán: Andy Ogide e Pablo Yánez, que compartiron unha mañá de baloncesto no colexio desa localidade da montaña lucense. Despois de realizar varios exercicios relacionados co deporte da canastra, Ogide e Yánez asinaron ducias de autógrafos e fotografáronse cos auténticos protagonistas da xornada: os alumnos do CEIP Becerreá.

Dende a Fundación BALOGAL apóiase hai moitas tempadas a actividade que o clube de baloncesto de Becerreá e o centro escolar levan a cabo a favor do deporte e da xuventude, moitas veces loitando contra as inclemencias do clima que sufre a montaña lucense no inverno, pero sempre proveitoso. ¡Parabéns!

"TODOS A XOGAR" EN MARCHA

2011-11-04T02:50:00.000-07:00

Este proxecto, coordinado pola Fundación BALOGAL co financiamento da Área de Benestar Social e Deporte, levarase a cabo desde outubro até abril.

Este programa, que pretende “achegar a actividade física a determinados grupos de poboación no medio rural dos concellos lucenses de menos de 5.000 habitantes que polas súas características adoecen dunha escasa oferta neste ámbito”-segundo sinalou Antonio Veiga-, botará a andar na súa primeira fase xa neste mes e desenvolverase até abril do ano que vén. Na presentación, na que estiveron presentes os monitores e monitoras que executarán as actividades do proxecto, tamén participaron Antón Bao, presidente da Fundación BALOGAL, e Cristino Menor, director deportivo da mesma e coordinador do proxecto.

Na súa intervención, o vicepresidente da Deputación, Antonio Veiga, fixo fincapé en que se trata “dun programa totalmente transversal, que implica desde o deporte ao benestar social, igualdade e xuventude, xa que pretende reactivar a actividade física nos segmentos de poboación que habitualmente non realizan deporte en concellos do rural nos que hai menos oportunidades”. Veiga indicou que esta proposta de dinamización da actividade física “non só se ofertará aos concellos, senón que tamén se desenvolverá en colaboración con colectivos de persoas con discapacidade, en risco de exclusión social, etc., porque entendemos que, malia estar nunha época de recortes orzamentarios nas administracións, non se debe reducir o gasto en benestar social, como se aprecia por exemplo na Xunta de Galiza, xa que aumentaría as desigualdades entre a poboación”. Antonio Veiga mencionou que “o proxecto conta cun orzamento de 200.000 euros, co que se vai conseguir chegar a máis de 2000 usuarios directamente, máis de 100 asociacións e 35 concellos lucenses para desenvolver este proxecto social e deportivo, ademais da boa noticia a nivel de emprego xa que para levar a cabo o “Todos a Xogar” procedeuse á contratación de 25 mozos e mozas”.

Pola súa banda, Antón Bao quixo lembrar o importante traballo que desenvolve a Fundación BALOGAL, cunha compoñente social importantísima, achegando a práctica deportiva e un estilo de vida saudábel á poboación lucense, do mesmo xeito que lembrou que neste mesmo camiño tamén se levou a cabo outro proxecto, cuxa parte importante dos resultados se presentaron o pasado venres, chamado PECOIDEL, e que obtivo grandes resultados na loita contra a obesidade infantil traballando desde o ámbito escolar.

O programa “Todos a Xogar”, segundo explicou Cristino Menor, director deportivo da Fundación BALOGAL, estabelecerase en torno a catro eixos de acción:
-Axudamos a facer deporte: ciclo de compoñente formativa destinado a persoas á fronte de entidades públicas, asociacións, colectivos de índole deportiva para potenciar o máximo os seus recursos orientados ao fomento da actividade física (formación en materia legal, apoio administrativo, subvencións, xeración de recursos públicos, etc)
-Eu tamén xogo no Breo: fomento da actividade física para colectivos de necesidades especiais como persoas con discapacidade física, persoas en risco de exclusión social, etc.
-Obradoiros deportivos: fomentar costumes saudables a través do exercicio físico de xeito lúdico na franxa de idade escolar entre 1º e 6º de primaria, centrando os esforzos en concellos e lugares onde os nenos e nenas adoezan da posibilidade de facer actividades deportivas.
-Non te retires, volve a xogar: dinamización da actividade física xerontolóxica, xa que a poboación envellecida é unha constante nos concellos do rural lucense, co que se trata de ofrecer actividades de envellecemento activo e tamén xerar dinámicas sociais que favorezan o contacto entre persoas maiores moitas veces illadas por cuestión da dispersión xeográfica.

Todas estas actividades serán desenvolvidas a partires desta semana por 25 monitores e monitoras que cubrirán todas as comarcas lucenses. Desta maneira, as asociacións, colectivos e concellos que solicitaron unha actividade das catro anteriores contarán cunha persoa e co material necesario para poñer en marcha esa actividade dúas horas á semana, durante seis meses, até o vindeiro mes de abril do próximo ano.